1. Baccalaureus Educationis Honneurs in Onderwysbestuur en -leierskap (SAKO-nr. 122408)

Navorsing het getoon dat onderwysleiers, in Suid-Afrika en internasionaal, voldoende vir die bestuurs- en leierskapsrol binne die sektor voorberei moet wees. Hoofde en ander persone wat bestuursrolle binne die onderwyssektor vervul, moet gevolglik met die nodige diepgaande kennis en vaardighede toegerus word. Benewens die navorsingsvaardighede waarop BEdHons in Onderwysbestuur en -leierskap fokus, wil hierdie kwalifikasie ook daarom voornemende en dienende onderwysbestuurders vanuit ’n Christelike perspektief met die nodige kennis en vaardighede toerus.

Toelatingsvereistes

• ' n Vierjaar- professionele onderwysgraad; OF
• ‘n Toepaslike baccalaureusgraad en ‘n erkende professionele onderwyskwalifikasie; OF
• ‘n Vierjaar- professionele onderwyskwalifikasie, asook ‘n gevorderde diploma in ‘n verwante subveld van die onderwys; EN
• ‘n Minimum gemiddelde punt van 60% vir die bogenoemde voorvereiste verwerfde kwalifikasie.                                     

Let asb. op die volgende belangrike inligting:

• Studente met onderwyservaring sal voorkeur geniet (sien die vereiste dokumente).
• Indien ‘n voornemende student oor die voorvereiste kwalifikasie beskik, maar nie ‘n minimum gemiddelde punt van 60% vir hierdie kwalifikasie behaal het nie, kan hy/sy steeds aansoek doen.  ‘n Bewys van onderwyservaring moet verskaf word deur middel van ‘n gestempelde briefhoof van die betrokke skool/skole waarin ervaring opgedoen is.
• Studente wat nie ‘n navorsingsmodule op voorgraadse (vlak 7) voltooi het nie, moet ‘n addisionele navorsingsmodule tydens die eerste studiejaar voltooi en die deeltydse opsie kies.
• Toelating van studente vind plaas na goeddunke van die Toelatingskomitee om te verseker dat voornemende studente oor die nodige akademiese vermoëns beskik wat vir ’n NKR-vlak 8-kwalifikasie vereis word.

Kwalifikasie-inligting

• Minimumvoorvereiste: Baccalaureusgraad
• NKR-vlak: 8
• Minimum tydperk: 1 jaar
• Verlengde program: 2 jaar

Metode van aanbieding

• Die kurrikulum word deur middel van afstandsonderrig aangebied.  Die lesings word weekliks op e-Klas (Aros se amptelike aanlyn leerplatform) beskikbaar gestel.

• Addisionele ondersteuning word deur middel van interaktiewe aanlyn sessies gebied. Tydens hierdie sessies kan u vrae aan dosente stel en verdere toeligting ontvang.  Die sessies word opgeneem en word later op e-Klas vir besigtiging beskikbaar gestel. 

• Dosente en assistente is beskikbaar vir konsultasies via e-pos, aanlyn of op kampus.

• Toetse en eksamens word aanlyn afgelê (Maandag tot Saterdag: tydens die dag of vroegaand). Datums en tye word vroegtydig gekommunikeer.

Koste per jaar in 2026

• Aansoekfooi: R250.00
• Registrasie: R3 500.00 (eerste deposito betaalbaar in Januarie 2026)
• Klasgeld: R47 690.00
• Handboekkoste (ongeveer): R7 500.00

Beskikbare kurrikulums

O502P

Kwalifikasie met onderskeiding

ʼn Student wat ‘n gemiddeld van 75% vir al die kern- en elektiewe modules behaal het, behaal die kwalifikasie met onderskeiding.

Programuitkomste

Ná die voltooiing van hierdie program is dit Aros se verwagting dat ‘n gegradueerde oor die volgende eienskappe en vaardighede sal beskik:

• toon ‘n grondige en wesenlike begrip van die filosofie van die opvoedkunde en van onderrig en leer vanuit ‘n Christelike perspektief;
• toon grondige kennis van, betrokkenheid by en die vermoë om onderwysbestuur en leierskapsteorieë, -take, -tegnieke en -vaardighede in ‘n skoolkonteks toe te pas;
• toon insig in die faktore wat ‘n skool se kultuur beïnvloed en die vermoë om ‘n skoolkultuur te kweek wat bevorderlik is vir leer;
• voer navorsing uit en lewer krities en analities verslag oor bevindings en aanbevelings;
• toon bevoegdheid in wetgewing, regspresedente, en professionele en etiese standaarde wat basiese onderwys in Suid-Afrika raak; en
• toon ‘n ingeligte begrip van die teorie en praktyk rondom die bestuur van ‘n skool se finansiële en menslike hulpbronne.

Kurrikulums

Kurrikulummodulelys