O150P Dip Graad R Onderrig

Hierdie kwalifikasie is spesifiek daarop gerig om persone wat nie aan die vereistes vir graadstudies voldoen nie, 'n toegangsroete tot BEd in Grondslagfase Onderrig te bied.

As deel van grondslagfaseonderwys in Suid-Afrika is die Diploma in Graad R Onderrig spesifiek daarop gerig om onderwysers op te lei wat fokus op die onderrig van Graad R-leerders. Praktykgebaseerde opleiding vorm die basis van hierdie kwalifikasie en dra daartoe by dat die student ontwikkel tot 'n professionele, kundige, roepingsgedrewe graad R-opvoeder.

Na suksesvolle voltooiing van die program sal studente die nodige leierskap aan die dag kan lê om innoverend te werk te gaan om leerders binne die spesifieke konteks van graad R te onderrig. Die opvoeder leer hoe om graad R-leerders toe te rus met die nodige waardes, vaardighede en kennis wat noodsaaklike boustene is vir formele onderrig binne die graad.

Onderrigmedium

  • Studente woon verpligte kontaksessies op Vrydae of Saterdae by Aros se kampus in Waverley te Pretoria by.
  • Deur die res van die week vind onderrig deur middel van e-Klas (via die internet) plaas.
  • Werkgeïntegreerde leer: Daar word van studente verwag om vir bepaalde tye prakties by skole te doen. Studente word vir die praktiese tydperk deur Aros by 'n skool geplaas (indien die student nie alreeds by 'n skool betrokke is nie).
    • Eerstejaarstudente begin met werkgeïntegreerde leer in die tweede en derde kwartaal.
    • Tweedejaar- en derdejaarstudente se praktiese tydperk begin vanaf die eerste skooldag vir 'n tydperk van drie weke asook gedurende die tweede en derde kwartaal.